Ասիայի չեմպիոն Ակբար Ջուրաևը զիջեց Գարիկ Կարապետյանին՝ վիրտուալ տիտանների մենամարտում

2025 թվականի ծանրամարտի Եվրոպայի առաջնությունից անմիջապես հետո, որը տեղի ունեցավ Նորվեգիայում և փայլուն ավարտ ունեցավ Հայաստանի համար, Չինաստանի Ցզյանշան քաղաքում անցկացվեց նաև Ասիայի առաջնությունը։ Հայ մարզասերների ուշադրության կենտրոնում էր մինչև 109 կգ քաշային կարգը, որտեղ հանդես էր գալիս Տոկիո-2020 Օլիմպիական խաղերի չեմպիոն Ակբար Ջուրաևը՝ Ուզբեկստանից։

25-ամյա Ջուրաևը ևս մեկ անգամ ցույց տվեց իր բարձր կարգը՝ նվաճելով երեք ոսկե մեդալ և երկամարտում հավաքելով 406 կգ (183 կգ պոկում, 223 կգ հրում)։ Սակայն այս արդյունքը 5 կիլոգրամով զիջում է Գարիկ Կարապետյանի՝ Եվրոպայի 2025 թվականի առաջնությունում գրանցած արդյունքին՝ 411 կգ (185+226)։

Այսպիսով՝ Եվրոպայի և Ասիայի առաջատարների այս անուղղակի մրցապայքարում ներկայում հաղթում է հայ մարզիկը։

Հետաքրքիր է, որ եվրոպական եզրափակչում «արծաթը» ևս բաժին հասավ Հայաստանին՝ Սիմոն Մարտիրոսյանը նույնպես գրանցեց 406 կգ արդյունք (181+225), ճիշտ ինչպես Ջուրաևը՝ Չինաստանում։ Հիշեցնենք՝ հենց Սիմոնը և Ակբարը պայքարում էին Տոկիոյի Օլիմպիադայի ոսկու համար, որտեղ հաղթեց ուզբեկ ծանրորդը՝ Օլիմպիական ռեկորդ սահմանելով՝ 430 կգ։ Սիմոնը դարձավ արծաթե մեդալակիր՝ 423 կգ արդյունքով։

Բարձրակարգ ռևանշը կարող է կայանալ աշխարհի առաջնությունում, որը կանցկացվի Նորվեգիայում՝ հոկտեմբերի 1-ից 10-ը։ Հենց այնտեղ էլ կպարզվի՝ ով է աշխարհի իսկական ուժեղագույնը մինչև 109 կգ քաշային (նոր կանոններով՝ մինչև 110 կգ) կարգում։

Ասիայի առաջնություն 2025, մինչև 109 կգ
Ակբար Ջուրաև (Ուզբեկստան) — 406 կգ (183+223)
Շարոֆիդդին Ամրիդդինով (Ուզբեկստան) — 395 կգ (181+214)
Չան Յոն Հակ (Հարավային Կորեա) — 390 կգ (178+212)

Եվրոպայի առաջնություն 2025, մինչև 109 կգ
Գարիկ Կարապետյան (Հայաստան) — 411 կգ (185+226)
Սիմոն Մարտիրոսյան (Հայաստան) — 406 կգ (181+225)
Լուիս Լաուրետ (Ռումինիա) — 390 կգ (180+210)