Նախկին UFC մարտիկ Սուման Մոխտարյանը սպանվել է Սիդնեյում

Նախկին UFC մարտիկն ու խառը մենամարտերի մարզիչ Սուման Մոխտարյանը (8-2) սպանվել է կրակոցով հոկտեմբերի 8-ի երեկոյան՝ Սիդնեյի արևմտյան շրջանում։ Ոստիկանությունը դեպքը դիտարկում է որպես կանխամտածված սպանություն։

Պատահարը տեղի է ունեցել ժամը 18:00-ի սահմաններում՝ Ռիվերսթոուն արվարձանի Annaluke Street փողոցում։ Իշխանությունների տվյալներով՝ 33-ամյա մարզիկը զբոսնում էր, երբ նրա վրա կրակ են բացել։ Դեպքի վայր ժամանած ոստիկաններն ու շտապօգնության աշխատակիցները հայտնաբերել են Մոխտարյանին հրազենային վնասվածքներով, սակայն փրկել նրան չի հաջողվել․ նա մահացել է տեղում։

Մոտ 15 րոպե անց՝ Riverstone Road-ում, հայտնաբերվել է այրված ավտոմեքենա։ Ոստիկանությունը կարծում է, որ մեքենան կարող է կապված լինել հանցագործության հետ։ Դեպքի վայրում և դրա շրջակայքում ստեղծվել են մի քանի քրեագիտական գոտիներ։

Նոր Հարավային Ուելսի ոստիկանության սերժանտը հայտարարել է, որ քննությունը շարունակվում է, և ուսումնասիրվում են բոլոր վարկածները, այդ թվում՝ հնարավոր կապերը կազմակերպված հանցավորության հետ։

Իրանյան ծագումով ավստրալացի Մոխտարյանը հանդես է եկել UFC-ում 2018-2019 թվականներին, այնուհետև զբաղվել է մարզչական գործունեությամբ։ Նա իր եղբոր՝ Աշքանի հետ ղեկավարում էր Australian Top Team ակումբը՝ օգնելով երիտասարդ ավստրալացի մարտիկներին սկսել իրենց ուղին MMA-ում։

Նրա աշակերտներից մեկը՝ մարտիկ Ջեսի Սուեյնը, Instagram-ում հրապարակել է հուզիչ գրառում․

«Չկարողացա քնել այս լուրից հետո։ Սումանը հավատում էր ինձ ավելի, քան ես ինքս։ MMA-ում իմ բոլոր հաջողությունները պարտական եմ նրան։ Նա մեզ ոգեշնչում էր, մեզանից պահանջում էր լավագույնը և երբեք չէր թողնում հանձնվենք։ Ես կշարունակեմ առաջ գնալ նրա համար»։

Սա առաջին դեպքը չէ, երբ Մոխտարյանի վրա են հարձակվել։ 2024 թվականի փետրվարին անհայտ անձը, որ կեղծ կերպով ներկայացել էր որպես առաքիչ, փորձել էր կրակել նրա վրա Australian Top Team մարզասրահի մոտ՝ Վենթվորթվիլում, սակայն այդ անգամ մարտիկը հրաշքով փրկվել էր։