«Լեգիայի» երկրպագուները շնորհակալություն են հայտնել FAF Ultras հայկական ֆան-ակումբին Երևանի օգնության համար
- Հեղինակ: Vahe Hakobyan
- Sportaran
Վարշավայի «Լեգիայի» երկրպագուները շնորհակալություն են հայտնել հայկական FAF Ultras ֆան-ակումբին ջերմ ընդունելության և օգնության համար՝ Կոնֆերենցիաների լիգայի շրջանակում «Նոայի» դեմ խաղի ժամանակ Երևան կատարած այցի ընթացքում, որը տեղի է ունեցել դեկտեմբերի 11-ին։
Հիշեցնենք, որ ՈՒԵՖԱ-ի որոշմամբ լեհական ակումբի երկրպագուների վրա դրված էր հյուր հանդիպմանը ներկա գտնվելու արգելք։ Չնայած դրան՝ շուրջ 700 «Լեգիայի» ֆանատներ ժամանել էին Երևան և կարողացել էին ներկա գտնվել խաղին՝ ձեռք բերելով տոմսեր տանտերերի երկրպագուների սեկտորներում։ Արդյունքում, «Նոա» ակումբի և իրավապահ մարմինների որոշմամբ լեհ երկրպագուները տեղավորվեցին հյուրերի տրիբունայում։
Քանի որ «Լեգիայի» երկրպագուների համար պաշտոնական հյուր այց չէր կազմակերպվել, քաղաքում չեն ապահովվել հատուկ տրանսֆերներ և կեցություն։ Այս իրավիճակում օգնության հասան հայկական ֆան-շարժման ներկայացուցիչները՝ FAF Ultras-ը, որոնք անհրաժեշտ աջակցություն ցուցաբերեցին լեհ երկրպագուներին Երևանում գտնվելու ընթացքում։
Շնորհակալության նշան դեկտեմբերի 14-ին Լեհաստանի առաջնության «Պյաստ Գլիվիցե»-ի դեմ խաղում «Լեգիայի» երկրպագուները տրիբունաներում պարզեցին «FAF Respect» գրությամբ բաններ։
Նշենք, որ այդ հանդիպումը անհաջող էր վարշավյան ակումբի համար․ «Լեգիան» պարտվեց 0:1 հաշվով և ներկայումս գտնվում է Լեհաստանի առաջնության վտանգավոր գոտում։ Հայաստանի ազգային հավաքականի կիսապաշտպան Վահան Բիչախչյանը հանդիպումը սկսեց մեկնարկային կազմում և խաղադաշտում անցկացրեց 67 րոպե։
Քննարկեք նորությունները!
Անցնել մեկնաբանություններին ↓
Comments
1