Վաճառվել են Հունգարիա – Հայաստան խաղի բոլոր տոմսերը մի քանի օրվա ընթացքում

Բուդապեշտում ֆուտբոլային աժիոտաժը հասել է գագաթնակետին․ Աշխարհի առաջնության ընտրական փուլի Հունգարիա – Հայաստան առաջիկա հանդիպման բոլոր տոմսերը վաճառվել են արդեն երկրորդ օրը։ Խաղը կկայանա հոկտեմբերի 11-ին, շաբաթ օրը, «Պուշկաշ Արենա» մարզադաշտում և կմեկնարկի տեղական ժամանակով 18:00-ին։

Տոմսերի վաճառքը մեկնարկել է սեպտեմբերի 22-ին՝ ժամը 10:00-ին։ Առաջին օրը տոմսեր գնելու հնարավորություն ունեին միայն Հունգարիայի ֆուտբոլային դաշնության (MLSZ) երկրպագուների ակումբի «ոսկե» կարգավիճակ ունեցող անդամները։ Հաջորդ օրը՝ սեպտեմբերի 23-ին, բացվեց նախնական պատուհան մյուս անդամների համար։ Սակայն պահանջարկն այնքան բարձր էր, որ նույն օրվա երեկոյան ազատ տեղեր այլևս չկային։ Այդպիսով, սեպտեմբերի 25-ին նախատեսված ընդհանուր վաճառքն ընդհանրապես չկայացավ։

Տոմսերը տարածվում էին բացառապես պաշտոնական ալիքներով՝ meccsjegy.mlsz.hu կայք, երկրպագուների ակումբի հարթակ, ինչպես նաև iOS և Android բջջային հավելվածներ։ Ըստ կանոնների, մեկ գործարքով հնարավոր էր գնել առավելագույնը չորս տոմս, որոնցից մեկը պարտադիր պետք է գրանցված լիներ գնորդի անունով։

Հայաստանից ժամանած երկրպագուների համար Բուդապեշտի այս հանդիպումը խոստանում է դառնալ իսկական ֆուտբոլային տոն։ Ավելի քան 65 հազար հանդիսատես տեղավորող «Պուշկաշ Արենա»-ն անպայման կլցվի մինչև վերջին տեղը՝ ստեղծելով կրքոտ մթնոլորտ երկու հավաքականների համար։