Ադրբեջանը և Ուզբեկստանը կընդունեն 2027 թվականի երիտասարդական աշխարհի առաջնությունը ֆուտբոլում

ՖԻՖԱ-ի խորհուրդը պաշտոնապես հաստատել է Ադրբեջանը և Ուզբեկստանը՝ որպես 2027 թվականի մինչև 20 տարեկանների ֆուտբոլի աշխարհի առաջնության (FIFA U-20 World Cup 2027™) համատեղ հյուրընկալող երկրներ։ Սա պատմական որոշում է, քանի որ առաջնությունն առաջին անգամ կանցկացվի միաժամանակ երկու երկրում՝ միավորելով Եվրոպան և Ասիան մեկ ֆուտբոլային հարթակի վրա։

ՖԻՖԱ-ի նախագահ Ջանի Ինֆանտինոն նշել է, որ առաջիկա առաջնությունը նշանակալի իրադարձություն կլինի ոչ միայն տարածաշրջանի, այլև ամբողջ աշխարհի ֆուտբոլի համար.

«Ուրախ եմ հայտարարել, որ ՖԻՖԱ-ի խորհուրդը ընտրել է Ադրբեջանին և Ուզբեկստանին՝ որպես 2027 թվականի երիտասարդական աշխարհի առաջնության հյուրընկալողներ։ Այս մրցաշարը կզարգացնի Եվրոպայի և Ասիայի համագործակցությունը և կդառնա հարթակ՝ մեր սպորտի ամենափայլուն երիտասարդ տաղանդների համար»։

Բացի այդ, ՖԻՖԱ-ի խորհուրդը որոշել է նոր ակումբային մրցաշարի՝ FIFA Women’s Champions Cup 2026-ի եզրափակիչ փուլի անցկացման վայրը։ Եզրափակիչ փուլը կանցկացվի Լոնդոնում (Անգլիա) և կընդգրկի չորս հանդիպում, որոնք կկայանան 2026 թվականի հունվարի 28-ից մինչև փետրվարի 1-ը։

Հիշեցնենք, որ Հայաստանը և Վրաստանը հայտ են ներկայացրել 2029 թվականի երիտասարդական աշխարհի առաջնությունը անցկացնելու համար։