Ազատ Հովհաննիսյանը մենամարտելու է ԱՄՆ-ում՝ անհաղթ Այդոս Մեդետի դեմ

Այսօր՝ հունվարի 23-ի լույս 24-ի գիշերը, հայ բռնցքամարտիկ Ազատ Հովհաննիսյանը (21-6) կմենամարտի հաղթանակ չկորցրած ղազախ առաջատար Այդոս Մեդետի (13-0) դեմ։ Մենամարտը տեղի կունենա ԱՄՆ Լոնգ Բիչ քաղաքում և նախատեսված է 8 ռաունդի համար։ Ուղիղ հեռարձակումը՝ DAZN հարթակում։

37-ամյա Հովհաննիսյանի համար սա ևս մեկ հնարավորություն է՝ հաղթական ուղի վերադառնալու բարդ մենամարտերի շարքից հետո։ Վերջին երեք մենամարտերում երկրորդ թեթև քաշային կարգի նախկին վարկանիշային երկրորդը և նախկին տիտղոսի հավակնորդը պարտվել է ուժեղ մրցակիցներին՝ Սեբաստիան Ռեյեսին (20-1), Դավիդ Պիկասոյին (32-1-1) և Լուիս Ներիին (37-2)։

Այդոս Մեդետը 24-ամյա երիտասարդ և հավակնոտ բռնցքամարտիկ է Ղազախստանից, որի համար հայ փորձառու մրցակցի դեմ մենամարտը կլինի լուրջ փորձություն։ Հաղթանակի դեպքում նա կկարողանա ամրապնդել իր դիրքերը միջազգային հարթակում։

Կդառնա՞ Հովհաննիսյանը լուրջ փորձություն Մեդետի համար, թե՞ տեղի կտա նոր սերնդին։ Պատասխանը կիմանանք շուտով։