Արթուր Միրանյանը ռազմական իրավիճակի պատճառով լքել է Իսրայելը և վերադարձել Երևան

Հայաստանի ազգային հավաքականի և իսրայելական «Բնեյ Սախնին» ակումբի հարձակվող Արթուր Միրանյանը ռազմական իրավիճակի սրման ֆոնին լքել է Իսրայելը և արդեն գտնվում է Երևանում։ Այդ մասին ֆուտբոլիստը հայտնել է Sportmedia.am-ին տված հարցազրույցում։

Միրանյանի խոսքով՝ արտասահմանցի խաղացողներին մի քանի օր առաջ տարհանել են երկրից։ Ֆուտբոլիստները մեքենայով հասել են Եգիպտոսի սահման, այնուհետև հատել են սահմանը և ժամանակավորապես մնացել այնտեղ։

«Մոտ երկու օր առաջ լեգեոներներին դուրս բերեցին երկրից։ Մենք մոտ 6–7 ժամ մեքենայով գնացինք մինչև Եգիպտոսի սահման, հետո մտանք Եգիպտոս։ Այնտեղ մեկ օր անցկացնելուց հետո ես թռա Երևան», — պատմել է Միրանյանը։

Ֆուտբոլիստը նշել է, որ Իսրայելում իրավիճակը չափազանց լարված էր։ Նրա խոսքով՝ ամեն օր հնչում էին օդային տագնապի ազդանշաններ, իսկ հակամարտության առաջին օրը նա արթնացել է հենց այդ ազդանշաններից։

«Իրավիճակը լիովին ռազմական էր։ Ամեն օր տագնապի ազդանշաններ էին հնչում։ Պատերազմի առաջին օրը ես արթնացա հենց այդ ազդանշաններից։ Ամենաշատ ռմբակոծությունները եղել են Հայֆա քաղաքում, և պայթյունների ձայները լսվում էին նույնիսկ մեր քաղաքում», — ասել է նա։

Միրանյանը հավելել է, որ երկրում մնալը վտանգավոր էր և հույս է հայտնել, որ իրավիճակը շուտով կկայունանա, որպեսզի ինքը կարողանա վերադառնալ և շարունակել իր բնականոն կյանքն ու կարիերան։

Ավելի վաղ հակամարտության սրման և Իսրայելում արտակարգ դրության հայտարարելու պատճառով երկրի ֆուտբոլի ազգային առաջնության բոլոր հանդիպումները հետաձգվել էին։