Հայ մարզիկները 2026 թվականի ձմեռային օլիմպիական խաղերում կմրցեն այլ երկրների հետ՝ Ֆրանսիայից եղբայրներ և Ռուսաստանից մեկ աստղ

Արդեն վաղը՝ փետրվարի 6-ին, Իտալիայի Միլանում և Կորտինա դ’Ամպեցցոյում մեկնարկում է 2026 թվականի Ձմեռային Օլիմպիադան։

Հայաստանի հավաքականի կազմում մրցավայր կմտնեն 5 մարզիկ՝ 3 մարզաձևերում։ Սակայն Հայաստանից բացի, Օլիմպիադային կմասնակցեն նաև այլ երկրների թիմերում ընդգրկված հայազգի մարզիկներ, ինչը կարող է մեծացնել հետաքրքրությունը խաղերի նկատմամբ։ Բացի այդ, նրանց մեջ կան բավականին հետաքրքիր մարզիկներ՝ Կիպրոսի, Ֆրանսիայի և Ռուսաստանի (AIN) կազմում։

Կիպրոս
Կիպրոսի կազմում հանդես կգա 29-ամյա լեռնադահուկորդ Յաննոս Քույումջյանը։ Սա նրա երկրորդ Օլիմպիադան է։ 2022-ին նա միակ մասնակիցն էր Կիպրոսից, իսկ այս տարի նրան կմիանա Անդրեա Լոյզիդուն։

Քույումջյանը կմասնակցի սլալոմի և հսկա սլալոմի մրցումներին, ինչպես Հայաստանի ներկայացուցիչ Հարություն Հարությունյանը։ 2022-ին նա 42-րդն էր հսկա սլալոմում, իսկ սլալոմում չավարտեց։

Նշենք, որ Քույումջյանը կիսով չափ հայ է․ հայ է հայրը, մայրը՝ կիպրոսցի Լինա Արիստոդիմուն՝ 1980-ի Օլիմպիական խաղերի մասնակից։

Մեդալի շանսեր՝ չկան
Մրցումների օրեր՝ փետրվարի 14 (հսկա սլալոմ), 16 (սլալոմ)

Ֆրանսիա
Ֆրանսիայի կազմում Մարսելից 2 եղբայրներ՝ Տերենս և Մելվին Չիքնավորյանները։ 33-ամյա Տերենսի համար սա արդեն երրորդ Օլիմպիադան է, իսկ Մելվինի՝ առաջինը։

Երկուսն էլ հանդես կգան ֆրիսթայլի սկի-քրոսս կարգում՝ խոչընդոտներով արագավազ մրցաձև։ Ֆրանսիան ավանդաբար ուժեղ է այստեղ, իսկ Չիքնավորյան եղբայրները նվաճել են իրենց ուղեգիրը բարդ ընտրական փուլում։

Տերենսը 2018-ին 28-րդն էր, 2022-ին՝ 18-րդ։ 2025-ին նա 20-րդն էր համաշխարհային դասակարգման մեջ, Մելվինը՝ 8-րդ։ Տերենսը 2022-ին եղել է համաշխարհային վարկանիշի երկրորդը։

Մեդալի շանսեր՝ քիչ, բայց իրական
Մրցումների օր՝ փետրվարի 21

Ռուսաստան (AIN)
Ռուսաստանի կազմում հանդես կգա հանրահայտ գեղասահորդուհի Ադելիա Պետրոսյանը՝ երկրի գլխավոր ոսկու հավակնորդը։

3-ակի Ռուսաստանի չեմպիոնուհին երկար դադարից հետո միայն մասնակցել է Պեկինի Օլիմպիական վարկանիշային մրցաշարին՝ հաղթելով։ Նրա գլխավոր խոչընդոտը միջազգային փորձի պակասն է ու վերջերս ստացած աճուկի վնասվածքը, որը, սակայն, չխանգարեց նրան հաղթել Պեկինում։ Եթե առողջ լինի, նա Օլիմպիադայի գլխավոր ֆավորիտն է։

Մեդալի շանսեր՝ շատ մեծ
Մրցումների օրեր՝ փետրվարի 17 (կարճ ծրագիր), 19 (ազատ ծրագիր)

Ինչո՞ւ չեն հանդես գալիս Հայաստանի կազմում
Քույումջյանի մակարդակը չի գերազանցում Հարություն Հարությունյանին, իսկ Գլեբ Մոսեսովը, ով շատ ավելի ուժեղ է, առեղծվածային պատճառներով դուրս մնաց։

Ֆրանսիայի Չիքնավորյան եղբայրները չէին կարող հանդես գալ Հայաստանից, քանի որ Հայաստանում չկա ֆրիսթայլի ֆեդերացիա, համապատասխան պայմաններ կամ ֆինանսավորում։

Ի դեպ, 1998-ին Հայաստանը ունեցել է ֆրիսթայլի ներկայացուցիչ՝ Արմեն Ռաֆայելյանը, ով զբաղեցրել է 19-րդ տեղ։

Ադելիա Պետրոսյանը իրական հնարավորություն ուներ հանդես գալ Հայաստանից։ Նրան առաջարկել էին փոխել մարզական քաղաքացիությունը, ինչպես դա արեցին Ակոպովա/Ռահմանին զույգը։ Բայց նա հրաժարվեց՝ հաշվի առնելով Ռուսաստանի ներդրումները և ակնկալիքները։ Հայաստանը հավանաբար չէր կարող փոխհատուցել այդ ծախսերը։