Հայ ըմբիշները հաղթանակներ են տարել Բունդեսլիգայի երկրորդ տուրում

Հայ ըմբիշներ Արսեն Հարությունյանը և Հայկ Մելիքյանը հաջողությամբ հանդես են եկել Գերմանական Բունդեսլիգայի երկրորդ տուրում՝ օգնելով իրենց ակումբին՝ KSV Köllerbach-ին, հաղթել ASV Mainz 88 թիմին։

Մինչև 61 կգ քաշային կարգում (ազատ ոճի ըմբշամարտ) Արսեն Հարությունյանը վստահ հաղթանակ է տարել գերմանացի Ֆելիքս Թայդեր Վինսոնի նկատմամբ՝ 16:0 հաշվով՝ ցուցադրելով բացարձակ առավելություն։

Մինչև 75 կգ քաշային կարգում (հունահռոմեական ոճ) Հայկ Մելիքյանը կամային հաղթանակ է տարել՝ 6:5 հաշվով՝ պարտության մատնելով թուրք ըմբիշ Մեհմեթ Շահինին, որը Եվրոպայի վերջին առաջնության բրոնզե մեդալակիր է։

Հիշեցնենք, որ Հարությունյանն ու Մելիքյանն առաջին տուրում ևս հաղթանակ էին տարել։

Երկրորդ Բունդեսլիգայում հանդես է եկել նաև հայ ըմբիշ Նորայր Ախոյանը (66 կգ, հունահռոմեական ոճ), որը ներկայացնում է RKG Reilingen ակումբը։ Լարված պայքարում նա 1:3 հաշվով զիջել է գերմանացի Մարկ Յանսկեին։