Հայաստանը միանում է World Boxing-ին՞։ Առաջին մրցաշարը՝ նոր կազմակերպության հովանու ներքո

Հայաստանի բռնցքամարտի ազգային հավաքականը մեկնել է Վրաստանի Բաթումի քաղաք՝ մասնակցելու Իրակլի Աբաշիձեի անվան միջազգային մրցաշարին։ Սա Հայաստանի տղամարդկանց հավաքականի առաջին արտասահմանյան մրցաշարն է 2025 թվականին։ Մինչ այս հայ մարզիկները հանդես էին եկել միայն Երևանում անցկացված տեղական մրցաշարում։

Հայաստանը հանդես է գալիս ամենաուժեղ կազմով՝ բացառությամբ +92 կգ քաշային կարգի, որտեղ բացակայում է 2024 թվականի Օլիմպիական խաղերի մասնակից Դավիթ Չալոյանը։

Մրցաշարին կմասնակցեն 11 երկրի ներկայացուցիչներ։ Ուղիղ եթերը հասանելի կլինի YouTube-ում՝ GMS TV ալիքի միջոցով։

Մրցումները կանցկացվեն հունիսի 25-ից մինչև հունիսի 29-ը։

Հայաստանի հավաքականի կազմը տպավորիչ է.

• 50 կգ — Բարեգամ Հարությունյան, Ռուդոլֆ Գարբոյան

• 55 կգ — Դավիթ Եգորյան, Ռուսլան Ասլիկյան

• 60 կգ — Արթուր Սարգսյան, Ժիրայր Սարգսյան

• 65 կգ — Նարեկ Հովհաննիսյան, Արթուր Շահպազյան

• 70 կգ — Զավեն Գալստյան, Արարատ Հարությունյան

• 75 կգ — Վախթանգ Հարությունյան

• 80 կգ — Համբարձում Հարությունյան

• 85 կգ — Ռաֆայել Հովհաննիսյան

• 92 կգ — Նարեկ Մանասյան, Դավիթ Սիմոնյան

• +92 կգ — Իշխան Հովսեփյան

Հատկապես ուշադրության է արժանի այն փաստը, որ մրցաշարը անցկացվում է World Boxing նոր միջազգային կազմակերպության հովանու ներքո, որն ստեղծվել է Բռնցքամարտի միջազգային ասոցիացիայում (IBA) առաջացած ճգնաժամին ի պատասխան։ Սա Հայաստանի առաջին մասնակցությունն է World Boxing-ի կողմից կազմակերպված մրցաշարին։

Թեև Հայաստանը դեռևս պաշտոնապես չի միացել World Boxing-ին, Բաթումիում մրցաշարին մասնակցությունն, հնարավոր է, հուշում է անդամակցության մասին։ Հիշեցնենք, որ Վրաստանը միացել է World Boxing-ին 2025 թվականի հունիսի 18-ին՝ դառնալով կազմակերպության 111-րդ անդամը։

Հայաստանի անդամակցությունը հետաքրքրություն է առաջացնում նաև այն պատճառով, որ սեպտեմբերի 4-ին Մեծ Բրիտանիայում կմեկնարկի World Boxing-ի հովանու ներքո անցկացվելիք առաջին աշխարհի առաջնությունը։ Այս մրցաշարը կարևոր է ոչ միայն սպորտային հեղինակության, այլև Լոս Անջելեսում կայանալիք 2028 թվականի Օլիմպիական խաղերի արդար ընտրական գործընթացի համար, քանի որ այժմ ընտրական փուլերի կազմակերպման պատասխանատվությունը կրում է World Boxing-ը։

Այսպիսով, Հայաստանի բռնցքամարտիկների մասնակցությունը Բաթումիում կարելի է համարել կարևոր քայլ դեպի նոր սպորտային համակարգի ինտեգրում և օլիմպիական ցիկլի նախապատրաստություն։