Հայաստանը կարող է կրկին հյուրընկալել սառցե հոկեյի աշխարհի առաջնությունը՝ Չորրորդ դիվիզիոնում

2026 թվականի սառցե հոկեյի աշխարհի առաջնության Չորրորդ դիվիզիոնի մրցաշարի հյուրընկալող երկրի ճակատագիրը մնում է անորոշ՝ որոշումը կընդունվի սեպտեմբերին կայանալիք IIHF-ի հավելյալ Կոնգրեսում։ Այս մասին հայտնել է Հայաստանի հոկեյի ֆեդերացիայի գլխավոր քարտուղար Արամ Սարգսյանը, ով ներկայումս գտնվում է Ստոկհոլմում՝ մասնակցելով IIHF-ի տարեկան Կոնգրեսին։

Սարգսյանի խոսքով՝ այս պահին մրցաշարի մասնակից որևէ երկիր ցանկություն չի հայտնել հյուրընկալելու առաջնությունը, ինչի արդյունքում IIHF-ը ստիպված է եղել հետաձգել ընդունող երկրի ընտրությունը։

«IIHF-ը սովորաբար չի թույլատրում, որ նույն երկիրը երկու տարի անընդմեջ հյուրընկալի առաջնությունը նույն դիվիզիոնում։ Այդ պատճառով Հայաստանի կրկին մրցաշարը հյուրընկալելու հնարավորությունները շատ փոքր են», – նշել է նա։ – «Սակայն եթե որևէ մասնակցող երկիր չհայտնի ցանկություն, մենք կունենանք հնարավորություն կրկին ընդունելու առաջնությունը»։

Հիշեցնենք, որ 2024 թվականի ապրիլին Հայաստանը հյուրընկալեց սառցե հոկեյի միջազգային մրցաշար՝ Երևանում կազմակերպելով Չորրորդ դիվիզիոնի առաջնությունը։ 

Սարգսյանը նաև նշել է, որ Կոնգրեսի ընթացքին Միջազգային հոկեյի ֆեդերացիա անդամակցելու նոր հայտեր չեն ստացվել։