Հայաստան և Պորտուգալիան ստորագրել են ֆուտբոլի ոլորտում համագործակցության մասին հուշագիր

Հայաստան–Պորտուգալիա հանդիպումից առաջ երկու երկրների ֆուտբոլային ֆեդերացիաների նախագահներ Արմեն Մելիքբեկյանը և Պեդրու Պրուենսան ստորագրեցին հայ-պորտուգալական ֆուտբոլի զարգացման մասին հուշագիր։

«Առաջին անգամ եմ Հայաստանում, և ինձ համար մեծ անակնկալ էր Հայաստանի ֆուտբոլի ֆեդերացիայի կողմից այսպիսի ջերմ ընդունելությունը։ Այս փաստաթուղթը սկիզբ կդնի մեր սերտ համագործակցությանը, և մենք կբերենք Հայաստան պորտուգալական ֆուտբոլի գաղտնիքները», — նշեց Պորտուգալիայի ֆուտբոլի ֆեդերացիայի նախագահ Պեդրու Պրուենսան։

Համաձայնագիրը նախատեսում է համատեղ մրցաշարերի, սեմինարների և կրթական դասընթացների իրականացում։ Համագործակցության շրջանակներում ընդգրկվելու են սպորտային ենթակառուցվածքների և ակադեմիաների կառուցումը, սպորտային բժշկությունը, մարզումային գործընթացում նորագույն տեխնոլոգիաների ներդրումը, ինչպես նաև մարզիչների և ֆիզիոթերապևտների վերապատրաստումը։

«Իհարկե, մենք մեծ օգուտ կարող ենք ստանալ այս հուշագրից։ Ամենակարևորն է Պորտուգալիայի փորձը, որտեղ շատ լավ կազմակերպված է աշխատանքը երիտասարդների հետ և գործում են հզոր ֆուտբոլային ակադեմիաներ։ Բացի այդ, պորտուգալական փորձը մեզ կօգնի ստեղծել Պրոֆեսիոնալ ֆուտբոլային լիգա», — ընդգծեց Հայաստանի ֆուտբոլի ֆեդերացիայի նախագահ Արմեն Մելիքբեկյանը։

Կողմերը նաև պայմանավորվեցին ֆուտբոլի և ֆուտզալի ազգային հավաքականների մասնակցությամբ ընկերական հանդիպումների կազմակերպման մասին։