Հայաստանը և Վրաստանը Երևանում կպայքարեն Unibank Cup-ի գավաթի համար

Այսօր՝ դեկտեմբերի 24-ին, Երևանում կկայանա միջազգային ֆուտզալի Unibank Cup մրցաշարի եզրափակիչ հանդիպումը։ Առաջին տեղի համար վճռորոշ խաղում կհանդիպեն Հայաստանի և Վրաստանի հավաքականները։

Խաղը կմեկնարկի Երևանի ժամանակով ժամը 20:00-ին և կանցկացվի ՀՖՖ Տեխնիկական կենտրոնում / Ավանի ֆուտբոլի ակադեմիայում։ Հանդիպումը կանցնի փակ ռեժիմով՝ առանց հեռարձակման, սակայն երկրպագուները կարող են ներկա գտնվել, քանի որ մուտքն անվճար է։

Ինչ պետք է իմանալ Հայաստանի հավաքականի մրցակցի մասին

Վրաստանի ֆուտզալի հավաքականը միջազգային ասպարեզում ամենալուրջ մրցակիցներից մեկն է․

• Վրաստանի հավաքականը զբաղեցնում է 15-րդ տեղը ՖԻՖԱ-ի վարկանիշում՝ ընդգրկվելով աշխարհի ամենաուժեղ հավաքականների շարքում (Հայաստանը՝ 23-րդ տեղում)

• 2022 թվականին վրացիներն իրենց պատմության մեջ առաջին անգամ դուրս եկան Եվրոպայի առաջնության եզրափակիչ փուլ և անմիջապես նվաճեցին փլեյ-օֆֆի ուղեգիր։ Քառորդ եզրափակչում նրանք լարված պայքարում 1:3 հաշվով պարտվեցին մրցաշարի ապագա ֆինալիստ Ռուսաստանի հավաքականին։

• Վերջին չորս տարիներին Հայաստանի և Վրաստանի հավաքականները անցկացրել են չորս հանդիպում․ երեքում հաղթել է Վրաստանը, մեկում՝ Հայաստանը։ Բոլոր խաղերն անցել են հավասար և լարված պայքարում։ Վերջին հանդիպումն ավարտվել է Հայաստանի տնային հաղթանակով՝ 3:1 հաշվով։

• Վրացական թիմի առաջատարներից մեկն է Ռուսաստանի «Տյումեն» ակումբի ունիվերսալ ֆուտբոլիստ Գիորգի Գավտաձեն, որը նույն ակումբում է խաղում Հայաստանի հավաքականի հարձակվող Դենիս Նևեդրովի հետ։

Նշենք, որ Unibank Cup-ի հանդիպումը կարևոր նախապատրաստական փուլ է երկու հավաքականների համար՝ 2026 թվականի Եվրոպայի առաջնությանը ընդառաջ, որը կկայանա Լատվիայում, Լիտվայում և Սլովենիայում՝ հունվարի 21-ից փետրվարի 7-ը։

Մրցաշարի եզրափակիչ խաղը խոստանում է լինել սկզբունքային և դիտարժան, իսկ երկրպագուները հնարավորություն կունենան աջակցել Հայաստանի հավաքականին անմիջապես տրիբունաներից։