Արման Ծարուկյանը առաջին անգամ ընդգրկվեց UFC-ի P4P վարկանիշում՝ անկախ քաշային կարգից

Թեթև քաշային կարգում հանդես եկող հայ MMA մարտիկ Արման Ծարուկյանը (22-3) իր կարիերայում առաջին անգամ ընդգրկվեց UFC-ի լավագույն մարտիկների P4P (անկախ քաշային կարգից) վարկանիշում՝ զբաղեցնելով 15-րդ տեղը Չարլզ Օլիվեյրայից հետո։

Սա պատմական օր է հայկական MMA-ի համար․ առաջին անգամ հայ տղամարդ մարտիկը մտավ մոլորակի լավագույն մարտիկների ցուցակ՝ անկախ քաշային կարգից։ Մինչ այս, միայն Քեթլին Չուքագյանն էր 8-րդ հորիզոնականը զբաղեցրել P4P վարկանիշում կանանց շարքում։

UFC-ի թարմացված P4P վարկանիշում առաջատար դիրքերում փոփոխություններ չեն եղել․ առաջին տեղում մնում է Իսլամ Մախաչևը, որին հաջորդում են Ջոն Ջոնսը և Իլիա Թոփուրիան։ Սակայն Արման Ծարուկյանը, որը դարձել է թեթև քաշային կարգի վարկանիշի առաջատար, ճանաչում ստացավ նաև UFC-ի լավագույն մարտիկների շարքում։

Հիշեցնենք, որ իր վերջին մենամարտում Արման Ծարուկյանը հաղթել էր Չարլզ Օլիվեյրային, բարձրացել թեթև քաշային կարգի առաջին հորիզոնական և ստացել հնարավորություն մենամարտելու Իսլամ Մախաչևի հետ գոտու համար։ Սակայն մեջքի վնասվածքի պատճառով նա չկարողացավ մասնակցել չեմպիոնական մենամարտին։ Ներկայումս նա մնում է հավակնորդ, սակայն մինչև տիտղոսային մենամարտը, հավանաբար, ստիպված կլինի ևս մեկ հավակնորդային մենամարտ անցկացնել։

Այսպիսով, Արման Ծարուկյանի ընդգրկումը UFC-ի P4P վարկանիշում հաստատում է նրա բարձր մակարդակը և հեռանկարները թեթև քաշային կարգում։ Հիմա նրա հաջորդ նպատակը՝ վերջնականապես ամրագրել իր կարգավիճակը համաշխարհային MMA-ի էլիտայի շարքում և նվաճել չեմպիոնական գոտին։