Արման Ծառուկյանը գրեպլինգի մենամարտ կանցկացնի Մոսկվայում

UFC-ի աստղ Արման Ծառուկյանը (22-3) շարունակում է ակտիվ մասնակցությունը գրեպլինգի մենամարտերին․ մայիսի 31-ին նա դուրս կգա միջին քաշային կարգի մենամարտի՝ ընդդեմ Bellator-ի նախկին թեթև քաշային չեմպիոն՝ բրազիլացի Պատրիկի «Փիթբուլ» Ֆրեյրեի (25-13): Մենամարտը կկայանա ADXC 10 մրցաշարի շրջանակում, որը կանցկացվի Մոսկվայում։

Հիշեցնենք, որ ընդամենը վերջերս՝ մայիսի 2-ին, Դուբայում, Ծառուկյանը հաղթեց Մակաշարիպ Զայնուկովին գրեպլինգի մենամարտում։ Այժմ նրան սպասվում է ավելի փորձառու և տիտղոսակիր մրցակից՝ 39-ամյա Ֆրեյրեն, բրազիլական ջիու-ջիթսուի վարպետ և Bellator-ի վետերան։ Պատրիկին իր վերջին MMA մենամարտն անցկացրել է 2024 թվականի հունիսի 21-ին՝ PFL 5 մրցաշարի ընթացքում, որտեղ պարտվել է Բրունո Միրանդային՝ բաժանված որոշմամբ։

Ծառուկյանը ավելի վաղ բացատրել էր, թե ինչու է կենտրոնացել գրեպլինգի վրա՝ UFC-ի թեթև քաշային կարգում իրավիճակի հստակեցման սպասման ընթացքում։

«Հիմա չեմ մասնակցում UFC-ի չեմպիոնական մրցավազքին։ Պետք է սպասեմ՝ ինչ որոշում կկայացնի Իսլամ Մախաչևը։ Եթե նա անցնի կիսածանր քաշ, ես կմենամարտեմ թեթև քաշային կարգի ժամանակավոր տիտղոսի համար։ Եթե նա մնա՝ ստիպված կլինեմ կրկին մենամարտել հավակնորդի տիտղոսի համար, հնարավոր է՝ Օլիվեյրայի կամ Գեյջիի դեմ։ Բայց քանի դեռ ամեն ինչ անորոշ է, ես որոշեցի նորից զգալ մրցակցության ոգին և պահպանել մարզավիճակը այս մենամարտով», — ասել էր Ծառուկյանը Զայնուկովի դեմ մենամարտից առաջ։