Արման Ծառուկյանը սպասվող մենամարտի մասին․ «Ամենակարևորը՝ պատրաստ լինելն է»

Արման Ծառուկյանի ապագան UFC-ում դեռևս հարցականի տակ է։ Իսլամ Մախաչևի հետ մենամարտը չեղարկվելուց հետո՝ վնասվածքի պատճառով, թվում էր՝ UFC-ն այլևս ուշադրություն չի դարձնում թեթև քաշային կարգի ամենահեռանկարային մենամարտիկներից մեկին։ Թեև Արմանը պատրաստ էր վերադառնալ օկտագոն դեռ մարտին, այժմ արդեն ապրիլի կեսերն է, բայց նրա հաջորդ մենամարտի վերաբերյալ հստակ տեղեկատվություն դեռ չկա։

Հնարավոր տարբերակներից մեկը Պեդի Պիմբլեթի հետ մենամարտն է, ով վերջերս հաղթանակ է տարել Մայքլ Չանդլերի նկատմամբ։ Հաշվի առնելով Պիմբլեթի կարգավիճակը՝ նրա համար հաջորդ տրամաբանական քայլը թոփ-5-ի ներկայացուցչի դեմ մենամարտն է, և Ծառուկյանը իդեալականորեն տեղավորվում է այդ սցենարում։ Սակայն անգլիացին մենամարտել է ընդամենը ապրիլի 12-ին, և նրա վերադարձը վանդակի մեջ ակնկալվում է ոչ շուտ, քան ամռան վերջը։ Այդքան երկար սպասելն Արմանի համար լավագույն տարբերակը չէ։

Մեկ այլ հնարավոր մրցակից՝ Իլիա Տոփուրիան է, ով վերջերս հայտարարեց թեթև քաշային կարգ տեղափոխվելու մասին։ Սակայն այս դեպքում էլ հստակություն չկա՝ բանակցություններ չեն ընթանում, պաշտոնական նորություններ չկան։

UFC-ի լռության և ապագայի անորոշության ֆոնին Արմանը շարունակում է հանգիստ մնալ և մարզվել։ Ահա՝ ինչ է նա գրել սոցիալական ցանցերում․

«Շատերը հարցնում են՝ երբ է մենամարտը։ Ես հանգիստ եմ՝ մարզվում եմ, կենտրոնացած եմ և սպասում եմ իմ պահին։ Սպորտը միշտ էլ արդար չէ, բայց ես հավատում եմ, որ եթե աշխատում ես, չես հանձնվում ու հավատարիմ ես մնում ինքդ քեզ, ամեն ինչ կգա։ Ամենակարևորը՝ պատրաստ լինելն է, երբ պահը գա»։

Արման Ծառուկյանն այժմ ԱՄՆ-ում է և շարունակում է իր մարզումները։