Արման Ծառուկյանը տվեց իր առաջին հարցազրույցը Մախաչևի հետ մենամարտից հրաժարվելուց հետո

UFC-ի թեթեւ քաշային կարգի վարկանիշի առաջին համար Արման Ծառուկյանը եղել է լրագրող Արիէլ Հելվանիի հյուր։ Սա հայ մարտիկի առաջին հարցազրույցն էր այն բանից հետո, երբ նա հրաժարվեց UFC 311-ի շրջանակում Իսլամ Մախաչևի դեմ մենամարտից։

Հիշեցնենք, որ մենամարտից 2 օր առաջ Ծառուկյանը մեջքի ցավ էր զգացել և չէր կարողացել շարունակել քաշի նվազեցումը, ինչը ստիպել էր նրան հրաժարվել մենամարտից։

«Սա իմ կյանքի ամենադժվար որոշումն էր։ Ես ծախսել էի գումար, շատ ժամանակ և իմ առողջությունը՝ այս մենամարտի համար։ Շատ մարդիկ օգնեցին ինձ, աշխատեցին իմ համար։ Բայց սա խաղի մասն է՝ ես ուժեղ եմ և կարող եմ վերադառնալ։

Ամեն ինչ հրաշալի էր. ես ինձ լավ էի զգում, շատ էներգիա ունեի։ Բայց վերջին մամուլի ասուլիսից հետո ես մեջքի ցավ զգացի և չէի կարողանում շարժվել։ Ինձ մնում էր ընդամենը 2–3 կիլոգրամ քաշ կորցնել, բայց ես նույնիսկ շարժվել չէի կարող։

Բժիշկները և մերսողները փորձում էին օգնել ինձ, բայց ես չկարողացա շարունակել։

Ես սպասում էի, որ Դանա Ուայթն այսպես կասի մամուլի ասուլիսում։ Այո, ես պետք է հաստատեմ առաջին համարի կարգավիճակս։

Ես պատրաստ եմ մենամարտել ցանկացածի հետ, բայց անպայման ուզում եմ 5 ռաունդանոց մենամարտ։ Պետք է զգամ այդ հեռավորությունը՝ չեմպիոնական մենամարտից առաջ։

Ինձ համար ամենախելամիտ տարբերակը 5 ռաունդանոց մենամարտն է Չարլզ Օլիվեյրայի հետ, բայց ես պատրաստ եմ հանդիպել ցանկացածի հետ, նույնիսկ Մայքլ Չենդլերի հետ»։