Արման Ավանեսյանը արժանացել է 2025 թվականի Աշխարհային խաղերի լավագույն մարզիկի կոչմանը
- Հեղինակ: Vahe Hakobyan
- Sportaran
Հայ սամբիստ Արման Ավանեսյանը դարձել է Չենդուում (Չինաստան) անցկացվող 2025 թվականի Աշխարհային խաղերի գլխավոր հերոսներից մեկը։ Հանդիսավոր արարողության ժամանակ նա պարգևատրվել է հատուկ մրցանակով՝ որպես մրցաշարի լավագույն մարզիկ։
Պարգևատրման արարողությունը կայացել է մարտական սամբոյի մրցաշարի շրջանակում, որտեղ Ավանեսյանը նվաճեց ոսկե մեդալ 98 կգ քաշային կարգում։ Մրցանակը և հուշամեդալը նրան հանձնեցին Սամբոյի միջազգային ֆեդերացիայի (FIAS) նախագահ Վասիլի Շեստակովը և Աշխարհային խաղերի միջազգային ասոցիացիայի (IWGA) նախագահ Խոսե Պերուրենան։
Ավանեսյանը նշել է, որ հաղթանակին տանող ճանապարհը հեշտ չէր.
«Առաջին իսկ րոպեներից պարզ էր, որ հեշտ մրցապայքարներ չեն լինելու։ Առաջին մրցակիցը՝ աշխարհի երկակի չեմպիոն, երկրորդը՝ նույնպես տիտղոսակիր սամբիստ, իսկ եզրափակչում՝ Եվրոպայի չեմպիոն։ Յուրաքանչյուր մենամարտ իսկական քննություն էր։ Բայց այն ամենը, ինչ ներդրել էինք պատրաստության մեջ, արդարացվեց։ Շնորհակալ եմ Աստծուն և բոլորին, ովքեր կողքիս էին ու աջակցեցին ինձ», — ասաց նա։
Մարզիկը ընդգծեց, որ 2025 թվականը հատուկ տարի է իր համար.
«Ես հաղթեցի Եվրոպայի առաջնությունում, Աշխարհային խաղերում… բայց ամենամեծ հաղթանակը որդուս ծնունդն է։ Իմ համար սա իսկապես հաղթանակների տարի է։ Այժմ գլխավոր նպատակը նոյեմբերին կայանալիք աշխարհի առաջնությունն է»։
Ավանեսյանը նաև խոսեց երիտասարդ մարզիկների հետ.
«Երբեք մի հանձնվեք։ Նույնիսկ պարտությունները ձեզ ուժեղացնում են։ Վստահեք ձեր երազանքներին և գնացեք մինչև վերջ — ձեր ժամանակը անպայման կգա»։
Քննարկեք նորությունները!
Անցնել մեկնաբանություններին ↓
Comments
0