Արեն Հակոբյանը կրկին Կոնդրատևի ճանապարհին է․ հայ մարտիկը կմենամարտի ACA գոտու համար

Մոսկվայում անցկացված հոբելյանական ACA 200 մրցաշարում Անատոլի Կոնդրատևը (13-4) վստահ հաղթանակ տարավ գործող չեմպիոն Ազամատ Փշուկովի (14-4) նկատմամբ՝ ավարտելով մենամարտը տեխնիկական նոկաուտով արդեն առաջին ռաունդում։ Այս հաղթանակը Կոնդրատևին բերեց ACA-ի չեմպիոնական գոտին թեթևագույն քաշային կարգում։

Մենամարտից անմիջապես հետո նոր չեմպիոնը հայ մարտիկ Արեն Հակոբյանի հետ անցկացրեց հայացքների դուել։ Այդ պահը հստակ հաստատում էր, որ հենց Հակոբյանն է լինելու հաջորդ տիտղոսի հավակնորդը։

Այսպիսով, իր հաջորդ մենամարտում Արեն Հակոբյանը (19-3-1), ով ունի յոթ անընդմեջ հաղթանակներից բաղկացած տպավորիչ շարք, հնարավորություն կստանա պայքարելու ACA-ի չեմպիոնական գոտու համար թեթևագույն քաշային դիվիզիոնում։

Առանձնահատուկ ուշադրության է արժանի հետաքրքիր վիճակագրական փաստը․ 2015 թվականից ի վեր Անատոլի Կոնդրատևը կրել է ընդամենը երեք պարտություն, և բոլորն էլ՝ հայ մարտիկներից։ Տարբեր տարիներին նա պարտվել է Վարդան Ասատրյանին, Մորիս Բոլեյանին, ինչպես նաև հենց Արեն Հակոբյանին, ով հաղթել է Կոնդրատևին նրանց առաջին մենամարտում 2023 թվականին։

Այժմ Կոնդրատևը հնարավորություն կունենա պատասխանել այդ պարտությանը արդեն չեմպիոնի կարգավիճակում, իսկ Հակոբյանը՝ հաստատել իր առավելությունը և նվաճել տիտղոսը։