«Արարատ-Արմենիա»-ն կամային հաղթանակ տարավ «Արարատի» դեմ դերբիում

Հայաստանի Պրեմիեր Լիգայի 5-րդ տուրում «Արարատ-Արմենիա»-ն տպավորիչ կամային հաղթանակ տարավ «Արարատի» նկատմամբ՝ 4:2 հաշվով։

77-րդ րոպեին Մանուել Տուլիպայի թիմը պարտվում էր 1:2 հաշվով, սակայն կարողացավ փոխել խաղի ընթացքը։ Ժոաո Կեյրուշը հավասարեցրեց հաշիվը, ապա Արայիկ Էլոյանը առաջ մղեց «Արարատ-Արմենիա»-ին՝ գոլի հեղինակ դառնալով չիրացված 11-մետրանոցից հետո։ Վերջնական հաշիվը ձևավորեց Մեթյու Գբոմադուն։

Նշենք, որ Հայաստանի Մ-21 հավաքականի 20-ամյա հարձակվող Արայիկ Էլոյանը երկրորդ խաղն անընդմեջ դառնում է հաղթական գոլի հեղինակ։

«Արարատի» կազմում գոլերով աչքի ընկան Խալդի Մուստաֆան և Ադամա Մեյտեն։ Հատկապես պետք է նշել վերջինիս գոլը, որը նա խփեց խաղադաշտի կենտրոնից (տեսանյութ)։

Այս հանդիպումից հետո Հայաստանի հավաքականի ֆուտբոլիստները կմիանան Եղիշե Մելիքյանի թիմին՝ պատրաստվելու 2026թ. Աշխարհի առաջնության ընտրական փուլի խաղերին Պորտուգալիայի և Իռլանդիայի դեմ։

• Կամո Հովհաննիսյան («Արարատ-Արմենիա») — խաղաց ամբողջական հանդիպում, գոլային փոխանցում կատարեց Կեյրուշին։

• Էդգար Գրիգորյան («Արարատ-Արմենիա») — անցկացրեց ամբողջ խաղը, գրանցեց գոլային փոխանցում Ֆոֆանայի ինքնագոլին։

• Ժիրայր Շաղոյան («Արարատ-Արմենիա») — խաղաց 80 րոպե։

• Ալբերտ Խաչումյան («Արարատ») — անցկացրեց ամբողջ հանդիպումը։

• Արթուր Սերոբյան («Արարատ-Արմենիա») հանդիպմանը չմասնակցեց, քանի որ գտնվում է նոր ակումբ տեղափոխվելու գործընթացում։