«Արարատ-Արմենիան ավելի լավն էր, քան մենք» – «Ունիվերսիտատեա Կլուժի» ավագն ու գլխավոր մարզիչը

«Ունիվերսիտատեա Կլուժը» ավարտեց իր ելույթը UEFA Կոնֆերենցիաների Լիգայում՝ Ռումինիայում լրացուցիչ ժամանակում 1:2 հաշվով զիջելով «Արարատ-Արմենիային» (առաջին խաղն ավարտվել էր գոլազուրկ ոչ-ոքի): Խաղից հետո թիմի ավագ Ալեքսանդրու Չիպչիուն և գլխավոր մարզիչ Իոան Օվիդիու Սաբեուն կիսվեցին զգացմունքներով և գնահատեցին անհաջողության պատճառները։

Մեջբերումներ Golazo.ro կայքից։

Ալեքսանդրու Չիպչիու. «Կատастрофիկ իրավիճակ է»
«Ունիվերսիտատեա Կլուժի» ավագը ընդունեց մրցակցի առավելությունը և նշեց, որ «Արարատ-Արմենիան» ցուցադրեց այնպիսի մակարդակ, որը Ռումինիայում թույլ կտար պայքարել չեմպիոնության համար․

«Կարծում եմ՝ ամեն ինչ կախված է նրանից, թե ինչ անկյունից ենք նայում։ Հնարավոր է՝ մեզ մոտ տպավորություն էր մնացել, որ մենք շատ ուժեղ ենք, որ մենք ֆուտբոլի գագաթին ենք։

Բայց իրականությունը երբեմն գլխով է հարվածում։ Նրանք ավելի լավն էին մեզանից, և ես նույնիսկ կասեմ՝ շատ ավելի լավ։ Մենք պետք է առաջ շարժվենք, բայց հիմա մեր մոտ կատастрофիկ իրավիճակ է․ կենտրոնական պաշտպաններ չունենք, բազմաթիվ վնասվածքներ ունենք, խաղն ավարտեցինք դաշտում երիտասարդներով։

Մենք շատ ծանր դրության մեջ ենք հաջորդ խաղերից առաջ։ Ժամանակ է պետք վերականգնվելու համար, իսկ առջևում շատ բարդ առաջնություն է։

Նույնիսկ ՖԿՍԲ-ի հետ խաղի փորձը ունենալով՝ մենք թուլացած չէինք, բայց «Արարատ-Արմենիան» ավելի ուժեղ դուրս եկավ։ Դա թիմ է, որը 100%-ով կպայքարեր Ռումինիայի առաջնության չեմպիոնության համար»։

Իոան Օվիդիու Սաբեու. «Ես եմ մեղավոր այս դուրսմղման համար»
Ռումինական ակումբի գլխավոր մարզիչը պատասխանատվությունը վերցրեց իր վրա՝ բացատրելով, որ թիմը եվրագավաթներին պատրաստ չէր լավագույն վիճակում․

«Ցանկացած մեկը, ով հասկանում է ֆուտբոլից և նայում է մանրամասներին, տեսնում է մակարդակի մեծ տարբերությունը, սա փաստ է։

Ես մեղավոր եմ, որ չկարողացա բավականաչափ համոզիչ լինել։ Չկարողացա պնդել, որ պետք է ուժեղացումներ, որ ծանր մրցաշրջան է լինելու։ Անցած առաջնությունում խաղացողները գերազանցեցին իրենց, բայց նրանց կողքին անհրաժեշտ էին ավելի որակյալ ֆուտբոլիստներ, ինչը մենք չարեցինք։

Մենք նախապատրաստությունը սկսեցինք առանց 8-9 խաղացողների, նրանք գալիս էին մեկ առ մեկ՝ անպատրաստ։ Տեսնում էինք, որ 60-րդ րոպեին Լուկաչն այլևս չէր կարողանում վազել, ոտքերը ցավում էին, նույնը՝ Սիլվայի դեպքում, մյուսները չէին հասցնում ռիթմին, իսկ մրցակիցը՝ ավելի արագ, ավելի դինամիկ, ավելի վստահ խաղում էր գնդակով։

Մեզ պահեր էին տրված, կարող էինք հաշիվը 2:0 դարձնել առաջին կեսում Լուկաչի միջոցով, բայց ընդհանուր առմամբ նրանք մեզ վրա գերիշխում էին։ Մենք պարզապես չկարողացանք դիմանալ նրանց տեմպին և պրեսինգային խաղին։ Սա իրականությունն է»։

«Արարատ-Արմենիան» լրացուցիչ ժամանակում հաղթեց «Ունիվերսիտատեա Կլուժին» (ՎԻԴԵՈ)