Անուշ Գրիգորյանը դուրս եկավ «Ստրանջա-2026» գավաթի քառորդ եզրափակիչ, երեք հայ բռնցքամարտիկներ ավարտեցին ելույթները

Փետրվարի 25-ին, բռնցքամարտի միջազգային «Ստրանջա-2026» մրցաշարի երրորդ մրցումային օրը, ռինգ դուրս եկան Հայաստանի չորս ներկայացուցիչներ՝ երկու աղջիկ և երկու տղամարդ։

Ամենահաջող ելույթն ունեցավ Անուշ Գրիգորյանը (51 կգ)։ Հայ մարզուհին միաձայն դատավորների որոշմամբ վստահ հաղթանակ տարավ իտալուհի Միշել Վեսկովինինի նկատմամբ և դուրս եկավ հեղինակավոր մրցաշարի քառորդ եզրափակիչ։ Գրիգորյանի հաջորդ մրցակիցը կլինի սերբուհի Նինա Ռադովանովիչը։

60 կգ քաշային կարգում Արթուր Բազեյանը միաձայն դատավորների որոշմամբ պարտվեց ամերիկացի Սելիմ Էլլիս-Բեյին։ 18-ամյա Էլլիս-Բեյը ԱՄՆ-ի գործող մեծահասակների չեմպիոնն է և նախկինում ճանաչվել է երկրի լավագույն երիտասարդ բռնցքամարտիկ։ «Ստրանջա-2026»-ում Բազեյանը տարավ մեկ հաղթանակ և ավարտեց պայքարը 1/8 եզրափակչում։

Գերծանր քաշային կարգում (+90 կգ) Դավիթ Չալոյանը մրցաշարում իր առաջին մենամարտում պարտվեց Գերմանիան ներկայացնող Նիկիտա Պուտիլովին՝ դատավորների բաժանված որոշմամբ (1:3)։

Չկարողացավ հաջորդ փուլ անցնել նաև Էլիդա Քոչարյանը (65 կգ), որը 1:4 հաշվով պարտվեց 2025 թվականի աշխարհի առաջնության մրցանակակիր իռլանդուհի Գրեյնի Ուոլշին։

Այսպիսով, Հայաստանի հավաքականի կազմում «Ստրանջա-2026»-ում պայքարը շարունակում են՝

50 կգ — Ռուդոլֆ Գարբոյան
65 կգ — Արթուր Սահակյան
70 կգ — Հարություն Ակոպկոխյան
75 կգ — Մարատ Միքայելյան
51 կգ — Անուշ Գրիգորյան