Ամոս Նոնդին բանակցում է «Արարատ-Արմենիայի» հետ նոր պայմանագրի շուրջ

Քենիացի կիսապաշտպան Ամոս Նոնդին կարող է երկարաձգել իր մնալը «Արարատ-Արմենիայում»։ Footy-Africa-ի փոխանցմամբ՝ ակումբը և ֆուտբոլիստը վերսկսել են բանակցությունները նոր պայմանագրի վերաբերյալ, քանի որ նրա գործող պայմանագիրը ավարտվում է հունիսի 30-ին։

Անցած տարվա սեպտեմբերին կողմերը շատ մոտ էին նոր պայմանագիր ստորագրելուն, սակայն վերջին պահին բանակցությունները տապալվեցին։ Այժմ քննարկվում է երկամյա պայմանագիր։

Prostar գործակալության աղբյուրը, որը ներկայացնում է Նոնդիի շահերը, հայտնել է.
«Անցած ամռանը նա գրեթե ստորագրել էր, բայց վերջին պահին դա չիրականացավ։ Այժմ բանակցությունները վերսկսվել են, և «Արարատ-Արմենիան» առաջարկել է երկամյա պայմանագիր։ Ամոսը իրեն լավ է զգում ակումբում, սակայն, եթե ուժեղ եվրոպական լիգայից առաջարկ լինի, կարող է հեռանալ։ Նրա համար հարցը փողը չէ՝ նա ուզում է աճել և զարգանալ։ Նա շատ հավակնոտ ֆուտբոլիստ է»։

Նոնդին «Արարատ-Արմենիայում» է 2021 թվականից՝ անցկացնելով 77 հանդիպում բոլոր մրցաշարերում։ Նախորդ մրցաշրջանում նա մասնակցել է 28 խաղի, այդ թվում՝ Կոնֆերենցիայի լիգայի որակավորման փուլում։ Մինչ այդ հանդես է եկել Վրաստանում՝ «Դիլա Գորի» և «Քոլխեթի Փոթի» ակումբներում։

26-ամյա կիսապաշտպանը Քենիայի ազգային հավաքականի կազմում ունի 17 հանդիպում և 1 գոլ։ Transfermarkt կայքը նրա արժեքը գնահատում է 225 հազար եվրո։