Այզեք Դուլգարյանը հեռացվել է UFC-ից՝ սկանդալային պարտությունից հետո UFC Vegas 110 մրցաշարում
- Հեղինակ: Vahe Hakobyan
- Sportaran
Ամերիկացի մարտիկ՝ հայկական արմատներով Այզեք Դուլգարյանը զրկվել է իր UFC պայմանագրից՝ UFC Vegas 110 մրցաշարում վիճահարույց պարտությունից հետո, որտեղ նա առաջին ռաունդում զիջեց Յադիեր Դել Վալյեին։ Այս մասին տեղեկացրել է հայտնի ինսայդեր Արիել Հելվանին։
Դուլգարյանը պարտվեց խեղդող հնարքով հենց մեկնարկային ռաունդում, սակայն մենամարտը արագ դարձավ քննության և վեճերի թեմա՝ խաղադրույքների կասկածելի տատանումների պատճառով։ Մի քանի ժամ առաջ մինչև մարտիկների մուտքը օկտագոն՝ գծերը կտրուկ փոխվեցին․ Դուլգարյանի՝ որպես ֆավորիտի, ցուցանիշները անկանխատեսելիորեն նվազեցին, իսկ Դել Վալյեն դարձավ անսպասելի ֆավորիտ։
Մի շարք բուքմեյքերական ընկերություններ, ներառյալ Caesars Sportsbook, մարտից հետո որոշեցին վերադարձնել Դուլգարյանի վրա արված կորցրած խաղադրույքները՝ իրավիճակը անվանելով «անոմալ»։
Հելվանիի տեղեկություններով՝ պաշտոնական պատճառաբանությունը եղել է «մենամարտի արդյունքը», սակայն աղբյուրները նշում են, որ UFC-ը մտահոգված է հնարավոր անբարեխիղճ վարքով։
Արտաշարքային մեկնաբան և գործող մարտիկ Մայքլ Քիեսան եթերում կտրուկ քննադատել է Դուլգարյանի գործողությունները՝ դրանք անվանելով «անիմաստ» և «անհանգստացնող»։ Մասնագետների կարծիքով՝ Դուլգարյանի պաշտպանությունը խեղդող հնարքից շատ թույլ էր․ նա գրեթե փորձ չի արել պաշտպանվել, ինչը հարուցել է կասկածներ բազմաթիվ դիտողների և խաղադրույք կատարողների շրջանում։
«The Midwest Choppa» մականունով հանդես եկող Այզեք Դուլգարյանը ավարտում է իր UFC ուղին 2–2 հաշվով (7–2՝ պրոֆեսիոնալ կարիերայում)։ Մինչ այդ նա հայտնի էր իր ագրեսիվ ոճով և տպավորիչ վաղաժամ հաղթանակներով։
Այժմ մենամարտը և դրա հանգամանքները կարող են դառնալ Նևադայի սպորտային մենամարտերի հանձնաժողովի և UFC-ի ներքին կառույցների հետաքննության առարկա, որոնք արդեն խստացրել են վերահսկողությունը խաղադրույքների ոլորտում՝ 2022 թվականի նմանատիպ սկանդալներից հետո։
Քննարկեք նորությունները!
Անցնել մեկնաբանություններին ↓
Comments
0