48-ամյա Յոել Ռոմերոն դարձավ RAF ազատ ոճի ըմբշամարտի լիգայի չեմպիոն

Դեկտեմբերի 20-ին Ինդիանապոլիսում տեղի ունեցավ RAF 4 մրցաշարը՝ Real American Freestyle (RAF) նոր ազատ ոճի ըմբշամարտի լիգայի չորրորդ շոուն։ Լիգան անցկացվում է UFC-ին մոտ ոճական ձևաչափով։ RAF-ում հանդես են գալիս գործող ըմբիշներ, Օլիմպիական խաղերի մասնակիցներ, ինչպես նաև MMA մարտիկներ։

Երեկոյի գլխավոր մենամարտը կիսածանր քաշային կարգում էր, որտեղ 48-ամյա Յոել Ռոմերոն վստահ հաղթանակ տարավ 33-ամյա Պատրիկ Դաունիի նկատմամբ՝ 12:0 հաշվով։ Կուբացի վետերանը ցուցադրեց ըմբշամարտի բացառիկ մակարդակ, արագություն և ֆիզիկական պատրաստվածություն՝ մրցակցին չթողնելով ոչ մի հնարավորություն։ Այս հաղթանակով Ռոմերոն դարձավ RAF-ի առաջին կիսածանր քաշային չեմպիոնը։

Արդեն հայտնի է, որ Ռոմերոյի հաջորդ մրցակիցը կլինի UFC-ի հեռանկարային մարտիկ Բո Նիքալը, ինչը խոստանում է ավելի մեծ հետաքրքրություն նոր նախագծի նկատմամբ։

Մրցաշարի գլխավոր սենսացիաներից մեկը դարձավ ազատ ոճի ըմբշամարտի գործող աշխարհի չեմպիոն Զահիդ Վալենսիայի պարտությունը, ով զիջեց Պարկեր Կեքայսենին։ Հատկանշական է, որ նախկինում Կեքայսենը չէր կարողացել տեղ գտնել ԱՄՆ հավաքականում, սակայն RAF 4-ում բարձրաձայն հայտարարեց իր մասին։

RAF 4 մրցաշարի արդյունքները

• Ուայթ Հենդրիքսոն (ԱՄՆ) հաղթեց Մեյսոն Փարիսին (ԱՄՆ) և դարձավ ծանր քաշային չեմպիոն

• Յոել Ռոմերո (Կուբա) հաղթեց Պատրիկ Դաունիին (ԱՄՆ) և դարձավ կիսածանր քաշային չեմպիոն

• Դեյվիդ Քարր (ԱՄՆ) հաղթեց Բելալ Մուհամմադին (ԱՄՆ)

• Քենեդի Բլեյդս (ԱՄՆ) հաղթեց Ալարա Բոայդին (ԱՄՆ)

• Մագոմեդ Կադիմագոմեդով (Բելառուս) հաղթեց Դաստին Փլոթին (ԱՄՆ)

• Դիք Համիթի (ԱՄՆ) հաղթեց Էվան Ուիքին (ԱՄՆ)

• Պարկեր Կեքայսեն (ԱՄՆ) հաղթեց Զահիդ Վալենսիային (ԱՄՆ)

• Տրենտ Հիդլի (ԱՄՆ) հաղթեց Ջեյքոբ Կարդենասին (ԱՄՆ)

• Ջեյսոն Նոլֆ (ԱՄՆ) հաղթեց Էնդի Վարելային (ԱՄՆ)

RAF 4 մրցաշարը հաստատեց նոր լիգայի հավակնությունները և ցույց տվեց, որ «UFC-ի ոճով ազատ ըմբշամարտ» ձևաչափը կարող է գրավել մեծ անուններ և ստեղծել անսպասելի սպորտային սյուժեներ։