2025 թվականի ապրիլի 18-ին երեք հայ ծանրամարտիկներ հանդես կգան Եվրոպայի առաջնությունում

Ծանրամարտի Եվրոպայի 2025 թվականի առաջնության վեցերորդ մրցումային օրը՝ ապրիլի 18-ին, մրցահարթակ դուրս կգան Հայաստանի հավաքականի երեք ներկայացուցիչներ։

Մինչև 89 կգ քաշային կարգում մեծահասակների մակարդակով դեբյուտ կունենա 21-ամյա Մնացական Աբրահամյանը։ Նա թիմում փոխարինել է փորձառու Անդրանիկ Կարապետյանին։ Այս քաշային կարգում մրցաշարը խոստանում է լինել անկանխատեսելի․ օլիմպիական չեմպիոն Կարլոս Նասարը տեղափոխվել է ավելի բարձր քաշային կարգ, իսկ Անտոնիո Պիցցոլատոն և Կարապետյանը չեն մասնակցում։ Այդպիսով, Աբրահամյանն ունի իրական շանսեր մեդալների համար պայքարելու։ Նրա հիմնական մրցակիցներն են համարվում մոլդովացի Մարին Ռոբուն և գերմանացի Ռաֆայել Ֆրիդրիխը։ Հիշեցնենք, որ Մնացականը նախկինում երկու անգամ դարձել է Եվրոպայի երիտասարդական առաջնության բրոնզե մեդալակիր։

Կանանց մինչև 76 կգ քաշային կարգում միաժամանակ հանդես կգան երկու հայ մարզուհի՝ Եվրոպայի երիտասարդական չեմպիոնուհի, 18-ամյա Աննա Ամրոյանը և 23-ամյա Միլենա Խաչատրյանը։ Երկուսն էլ դիտարկվում են մրցանակային տեղերի հիմնական հավակնորդների թվում։

Մրցումները կմեկնարկեն Երևանի ժամանակով 17։00-ին։